Korporata e Investimeve Shqiptare anulon projektin për dy hotele dhe një qendër shërbimesh publike në Palasë.

Korporata e Investimeve Shqiptare (KISH) ka anuluar procedurën për përzgjedhjen e partnerit privat që do të zhvillonte dy struktura akomoduese në Palasë dhe Dhërmi, në këmbim të ndërtimit të një qendre të re shërbimesh publike në bregdetin e Jugut. Shkak për anulimin është bërë numri i pamjaftueshëm i aplikimeve të dorëzuara nga investitorët gjatë fazës së parë të konkurrimit.

Sipas njoftimit të publikuar nga Korporata, afati për shprehjen e interesit nga investitorët ishte 28 tetori, por numri i aplikimeve të paraqitura nuk ka qenë i mjaftueshëm për vijimin e procedurës.

“Për shkak të numrit të pamjaftueshëm të aplikimeve të dorëzuara për Fazën I të procedurës konkurruese”, thuhet në njoftimin e anulimit, ku saktësohet se procesi nuk do të kalojë në fazën e përzgjedhjes së partnerit privat.

Dy hotele në këmbim të ndërtimit të një qendre shërbimesh publike

Projekti “Qendra e Shërbimeve Publike Palasë” ishte konceptuar si një marrëveshje zhvillimi ndërmjet shtetit dhe sipërmarrjes private. Sipas kësaj skeme, shteti do të vinte në dispozicion prona publike në zona me potencial të lartë turistik, ndërsa investitori privat do të merrte përsipër financimin dhe ndërtimin e objekteve të reja të shërbimeve publike.

Në këmbim, partneri privat do të fitonte të drejtën për zhvillimin e dy strukturave akomoduese në prona shtetërore në Palasë dhe Dhërmi.

Projekti përfshinte tri zona të veçanta zhvillimi: një zonë të destinuar për ndërtimin e qendrës së shërbimeve publike dhe dy zona të tjera për zhvillimin e strukturave hoteliere dhe shërbimeve turistike.

Qendra e re e shërbimeve publike ishte planifikuar pranë rrethrrotullimit të Palasës, në një pronë shtetërore me sipërfaqe rreth 54.391 metra katrorë. Vendndodhja ishte përzgjedhur për të mundësuar akses të shpejtë drejt Palasës, Drimadhës dhe Dhërmiut, veçanërisht për shërbimet e sigurisë dhe emergjencave.

Në këtë kompleks parashikohej përfshirja e stacionit të Policisë së Palasës, Policisë Kufitare të Dhërmiut, ambienteve për Gardën e Republikës, shërbimit zjarrfikës, si dhe strukturave shëndetësore dhe të emergjencave.

Prona në Palasë, potencial zhvillimi prej 3.577 metrash katrorë

Një nga dy pronat e parashikuara për zhvillim hotelier ndodhet në Palasë, në një sipërfaqe prej 2.555 metrash katrorë, ku aktualisht ushtrohen funksione të stacionit të policisë.

Sipas dokumentacionit të projektit, prona kishte një potencial orientues zhvillimi prej rreth 3.577 metrash katrorë, me intensitet ndërtimi 1,4.

Në këtë zonë, investitori privat do të mund të zhvillonte një strukturë akomoduese dhe shërbime të lidhura me turizmin, në përputhje me kushtet e përcaktuara në procedurën konkurruese.

Në Dhërmi parashikohej hotel pranë vijës bregdetare

Zona e dytë e zhvillimit hotelier ndodhet në Dhërmi, në pronën e Policisë Kufitare pranë vijës bregdetare.

Prona përfshin një truall me sipërfaqe rreth 1.500 metra katrorë dhe një ndërtesë ekzistuese prej 312 metrash katrorë. Sipas projektit, sipërfaqja maksimale orientuese e zhvillimit ishte rreth 2.100 metra katrorë.

Zhvillimi i kësaj prone synonte krijimin e një strukture akomoduese dhe shërbimesh turistike, duke marrë në konsideratë vendndodhjen pranë bregdetit dhe integrimin e objektit me peizazhin përreth.

Investitori duhej t'i kalonte shtetit të paktën 35 për qind të sipërfaqes së hoteleve

Një nga kushtet kryesore të konkurrimit ishte detyrimi i investitorit privat për t'i kaluar Korporatës së Investimeve Shqiptare të paktën 35% të sipërfaqes së zhvilluar në secilën prej dy strukturave akomoduese.

Kjo pjesë e sipërfaqes do të shërbente si kundërvlerë për financimin dhe ndërtimin e Qendrës së Shërbimeve Publike në Palasë.

Skema synonte që ndërtimi i infrastrukturës publike të realizohej përmes angazhimit financiar të partnerit privat, ndërsa ky i fundit do të përfitonte

nga zhvillimi i pronave shtetërore në dy zona turistike të bregdetit të Jugut.

Megjithatë, procedura nuk arriti të siguronte numrin e nevojshëm të aplikimeve në fazën e parë, duke çuar në anulimin e saj përpara përzgjedhjes së partnerit privat.

Mungesa e aplikimeve, problem edhe për projekte të tjera të Korporatës

Anulimi i procedurës për zhvillimin e dy strukturave akomoduese në Palasë dhe Dhërmi vjen pas rasteve të tjera të projekteve të Korporatës së Investimeve Shqiptare, të cilat janë anuluar ose rishpallur për shkak të numrit të pamjaftueshëm të aplikimeve nga investitorët.

Në rastin e projektit “Qendra e Shërbimeve Publike Palasë”, mungesa e aplikimeve të mjaftueshme ka bërë që të mos vijojë procesi i konkurrimit, duke lënë pa një partner privat skemën e parashikuar për zhvillimin e dy hoteleve dhe financimin e qendrës së re të shërbimeve publike.

Njoftimi i anulimit nuk përcakton nëse projekti do të rishpallet në një procedurë të re apo nëse do të rishikohen kushtet e zhvillimit për të tërhequr interes më të madh nga investitorët.

Burimi: Monitor